2 LINGGONG GCQ SA METRO MANILA, KARATIG-PROBINSYA, APRUBADO NI PRRD; IBA PANG MGA RESTRIKSYON IPATUTUPAD

Inaprubahan na ni Pangulong Rodrigo Duterte ang rekomendasyon ng Inter-Agency Task Force on Emerging Infectious Diseases (IATF-EID) na isailalim ang National Capital Region at apat pang kalapit na probinsya nito sa general community quarantine (GCQ) simula sa darating na Lunes, Marso 22, 2021, hanggang Linggo, Abril 4.

Ito ang inanunsyo ni Presidential Spokesperson Harry Roque nitong Linggo, Marso 21, kaugnay sa pag-angat muli ng kaso ng Coronavirus disease 2019 (COVID-19) sa bansa.

Bukod sa Metro Manila, ang apat pang probinsyang kabilang sa listahan ng sasailalim sa GCQ ay ang Bulacan, Cavite, Laguna, at Rizal, kung saan ipatutupad din ang karagdagan pang mga restriksyon sa mga ito upang mapigilan ang lalo pang paglobo ng bilang ng apektado ng virus.

Sa ilalim ng Resolution No. 104, itinatakda ng IATF-EID ang sumusunod na mga hakbang sa nasabing mga lugar:

• Tanging mga importanteng lakad lamang papunta at pabalik sa mga lugar na sakop ng resolusyon ang pahihintulutan. Gayunpaman, papayagan pa rin ang operasyon ng mga pampublikong transportasyon alinsunod sa nauna nang inaprubahang kapasidad at mga panuntunan.
• Ipagbabawal din ang pagsasagawa ng mass gatherings o pagtitipon-tipon, kabilang na iyong mga may kinalaman sa pagsamba o pananampalataya.
• Hindi rin hinihikayat ang pagsasagawa ng face-to-face meetings.
• Hanggang 10 katao lamang ang maaaring dumalo sa kasalan, binyag, at libing.
• Hinihikayat din ang pribadong sektor na magpatupad ng alternatibong work arrangements kagaya ng ipinatutupad sa ehekutibong sangay ng pamahalaan, kung saan 30 hanggang 50 porsyento lamang ng kabuuang bilang ng mga empleyado ang maaaring personal na pumasok sa kani-kanilang opisina.
• Magiging limitado rin sa delivery at takeout ang operasyon ng mga restawran, cafe, at iba pang katulad na mga establisyimento. Samantala, pahihintulutan naman ang pagkain sa labas o al fresco dining, basta’t ipatutupad ng mga kainan ang mga karagdagang engineering at administrative control na kakailanganin. 
• Hindi rin hinihikayat ang pagtanggap ng mga bisita, partikular na iyong mga hindi kapamilya o kasamang naninirahan sa iisang bubong.
• Ipinapayo rin ang pagsuot ng face masks sa loob ng bahay.

Kaugnay pa rin sa layong makontrol ang paglobo ng mga kaso ng COVID-19 sa Kalakhang Maynila ay nagsimula nang ipatupad ng mga alkalde ng lugar noong Lunes, Marso 15, ang uniform curfew hours dito, mula alas-10 ng gabi hanggang alas-5 ng umaga. Tatagal naman ng hanggang dalawang linggo ang nasabing curfew.

Nitong lamang Sabado, Marso 20, ay naitala ang pinakamataas na kaso ng COVID-19 sa bansa na sumampa sa bilang na 7,999 katao.