LUNGSOD NG QUEZON — Pinaghahanap ngayon ang babaeng live-in partner ng isang lalaking nasa kustodiya ng Talipapa Police Station (PS-3) nang tangkain diumano nitong magpuslit ng marijuana para sa kanyang nobyo.
Siniksik na parang palaman sa ensaymada ang sachet ng marijuana ng kinilalang si Mary Jane Laroza, 34, ng Brgy. Pasong Tamo at ka-live in ng nakadetina ngayong si Jonathan Alonzo, 42, ng Brgy. Tandang Sora dahil sa drug charges.
Binisita umano ni Laroza si Alonzo noong Setyembre 29 bandang 8:30 p.m. Dali-dali na lang itong umalis matapos mag-abot ng isang buong ensaymada kay Alonzo nang hindi na ito pinapasok dahil lagpas na ng oras ng dalaw. Nang inspeksyunin, sumambulat sa duty jailer ang sachet ng marijuana.
Naglunsad na ng manhunt ang PS-3 kay Laroza na haharap din sa drug charge.