Siniguro ni Manila Mayor Francisco ‘Isko Moreno’ Domagoso na ang mga medical student sa lungsod na dumadalo sa face-to-face classes ay mababakunahan ng COVID-19 vaccine. 

“We made a commitment to the medical schools and students kasi ang gusto ko mapapanatag ‘yung mga magulang ng mga estudyanteng ‘yun na ‘yung kanilang mga anak at ‘yung environment kung saan sila mag aaral ng face to face, na medical students, ay maproteksyunan,” saad ni Domagoso sa kaniyang Facebook live. 

Noong Hunyo 1 ay inaprubahan ni Domagoso ang apela ng apat pang unibersidad na magsagawa ng limitadong face-to-face classes para sa kanilang medical programs. Kabilang dito ang University of the Philippines (UP) Manila, Emilio Aguinaldo College (EAC), PHINMA St. Jude College (SJC), at National University (NU). 

Nauna nang binigyan ni Domagoso ng permiso ang anim pang paaralan upang magsagawa ng face-to-face classes para sa kanilang medical programs. Ito ay ang Metropolitan Medical Center College of Arts and Sciences, Manila Theological College’s College of Medicine, Chinese General Hospital Colleges, Centro Escolar University (CEU), University of Santo Tomas (UST), at ang Pamantasan ng Lungsod ng Maynila (PLM) College of Medicine. 

Sa pakikipagpulong niya sa mga opisyal ng mga eskwelahan, hinikayat ng alkalde na magpabakuna ang mga ito pati na ang mga empleyado ng mga campus sa vaccination drive para sa A4 category na magsisimula sa Hunyo 7. 

“The A4 category has been simplified. It now includes all workers who are required to go outside their homes to perform their jobs. Kaya pwede na ang halos lahat. Antabayanan lang natin ang announcement na pwede na ang A4,” saad ni Domagoso. 

Siniguro rin niyang magbibigay ng suporta ang lokal na pamahalaan ng lungsod kapag naging positibo sa virus ang mga estudyante habang uma-attend sa kanilang mga klase.