‘‘Vacc2School’ CAMPAIGN, INILUNSAD NG DEPED

NATIONAL

Ni Monica N. Ladisla
Source: DepEd
Share on facebook
Facebook
Share on twitter
Twitter
Share on email
Email

Bilang pagsuporta sa national vaccination program ng pamahalaan, inilunsad ng Department of Education (DepEd) ang “Vacc2School: Ligtas na Bakuna, Para sa Balik-Eskwela” campaign kahapon, Mayo 13.

Layon ng kampanyang ito na magbigay impormasyon at himukin ang mga teaching, non-teaching personnel, at iba pang stakeholders na palaganapin ang vaccination drive at suportahan ang iba pang polisiyang saklaw nito.

Ang kampanyang ito ay isinagawa bilang suporta sa BIDA Solusyon Plus sa COVID-19 campaign ng Department of Health. 

Ani DepEd Secretary Leonor Briones, “I am encouraging everyone, especially the teachers, and other education personnel to participate in this campaign, and make informed decisions on vaccination to further intensify and advance our chances of safely returning to school.” 

Kamakailan, inaprubahan ni Pangulong Rodrigo Duterte at ng Inter-Agency Task Force ang hiling ni Sec. Briones na isali ang mga guro sa Priority Group A4.

“We would like to encourage our teachers to vaccinate themselves because it is not only a matter of protecting your personal rights, it is also a matter of protecting the lives and health of children which is also entrusted to our care,”  pahayag ni Sec. Briones.

Plano umano ng DepEd na mamigay ng iba’t ibang Vacc2School campaign information materials na ilulunsad sa iba’t ibang plataporma upang maiparating sa publiko ang layunin ng naturang kampanya.

LIBRENG SAKAY PATULOY PA RIN SA ILALIM NG GCQ — DOTr

NATIONAL

Ni Ivy Atompag
Photo: PNA
Share on facebook
Facebook
Share on twitter
Twitter
Share on email
Email

Sa ilalim ng GCQ ay patuloy pa ring makikinabang ang mga pasahero sa libreng sakay na ibinibigay ng Department of Transportation (DOTr) at Land Transportation Franchising and Regulatory Board (LTFRB) ayon kay DOTr Secretary Arthur Tugade ngayong araw, Mayo 14.

“Magpapatuloy ang pagbibigay ng DOTr at LTFRB ng libreng sakay sa ating mga healthcare workers, medical frontliners, essential workers at authorized persons outside of residence,” saad ni Tugade sa isang Facebook post.

Ayon sa kanya, ang service contracting program ng LTFRB ay patuloy na makatutulong sa publiko sa kasagsagan ng pandemya. 

“Nais nating makabawas kahit paano sa bigat na inyong pasan. Ang pamasaheng matitipid ninyo mula sa programang ito ay maaari ninyong magamit pambili ng pagkain at iba pang importanteng pangangailangan ng inyong pamilya at mahal sa buhay,” dagdag niya. 

Iniulat din ni Tugade na ang per kilometer incentive na natatanggap ng mga driver ng PUV sa ilalim ng programa ay nadagdagan din. 

Sa ilalim ng regular service contracting, ang mga jeepney driver ay nakatatanggap na ngayon ng Php27 kada kilometro mula sa dating Php11 habang ang mga bus driver naman ay nakatatanggap ng Php45.50 kada kilometro mula sa dating Php23.10.

Ang mga jeepney driver naman na kasama sa free ride program ay nakatatanggap na ng Php52.50 kada kilometro mula Php46.80 habang ang mga bus driver ay nakatatanggap ng Php82.50 mula sa dating Php46.80. 

“Nagdagdag din ang DOTr at LTFRB ng weekly incentive. Maaaring makatanggap ng dagdag na P7,000 ang mga PUV driver na kasali sa Service Contracting Program kung sila ay maglolog-in sa Systems App nang 5 beses (5 araw) sa loob ng isang linggo,” saad ng Kalihim.

KARAGDAGANG 15K DOSES NG SPUTNIK V VACCINES, DUMATING NA SA BANSA

NATIONAL

Ni Raiza F. Cabugwang
Photo courtesy of pna.gov.ph
Share on facebook
Facebook
Share on twitter
Twitter
Share on email
Email

Lumapag na sa bansa ang pangalawang batch ng Sputnik V Coronavirus disease 2019 (COVID-19) vaccines mula Russia nitong Miyerkules, Mayo 12, 2021.

Malugod itong sinalubong ng ilang mga opisyal ng pamahalaan, kabilang na sina Pandemic Task Force Adviser Dr. Teodoro Herbosa at Health Undersecretary Ma. Carolina Vidal-Taiño.

Ayon sa Department of Health (DOH), ang naturang batch, na naglalaman ng 15,000 doses ng bakuna, ay gagamitin bilang pangalawang dose kasunod ng unang batch ng Sputnik V vaccines na dumating sa bansa noong Mayo 1.

Sinabi ni DOH Undersecretary Taiño na ibibigay ang naturang bagong batch ng bakuna sa limang lungsod sa Metro Manila, na kinabibilangan ng Makati, Muntinlupa, Manila, Taguig, at Parañaque.

Dagdag pa ni Taiño, inaasahan din ang pagdating ng karagdagan pang 300,000 doses ng Sputnik V, na ipamamahagi bilang paunang dose, sa susunod na linggo.

Sa kabuuan ay nasa limang milyong Sputnik V vaccines ang inaasahang darating sa bansa.

Samantala, tiniyak naman ni Dr. Herbosa na maipamamahagi ang lahat ng COVID-19 vaccines bago pa man mawalan ng bisa ang mga ito. Ito ay kaugnay ng dalawang milyong doses ng AstraZeneca vaccines na posibleng mapawalang bisa na sa darating na Hunyo at Hulyo.

Ayon pa kay Herbosa, base na rin sa sinabi ni Vaccine Czar Carlito Galvez, Jr., inaasahan ng pamahalaan na makatatanggap ang bansa ng 10 milyong doses ng COVID-19 vaccines kada buwan.

“If we are able to have that kind of deliveries, supply will not be a problem. Ma-aachieve natin ang target, which is 70 million by November 27, 28. It’s a tight target but it looks doable,” saad ni Herbosa.

NCR PLUS, IBA PANG LUGAR SA BANSA, ISINAILALIM SA GCQ ‘WITH HEIGHTENED RESTRICTIONS’

NATIONAL

Ni Raiza F. Cabugwang
Pangulong Rodrigo Duterte, Photo courtesy of pna.gov.ph
Share on facebook
Facebook
Share on twitter
Twitter
Share on email
Email

Isinailalim ni Pangulong Rodrigo Duterte nitong Huwebes, Mayo 13, 2021, sa General Community Quarantine (GCQ) “with heightened restrictions” ang NCR Plus, na kinabibilangan ng Metro Manila, Bulacan, Cavite, Laguna, at Rizal, mula Mayo 15 hanggang 31, 2021.

Ang naturang desisyon ng Pangulo ay base na rin sa rekomendasyon ng Inter-Agency Task Force for the Management of Emerging Infectious Diseases.

Idineklara rin sa ilalim ng parehong kategorya ng quarantine ang mga lugar na nasa Cordillera Administrative Region (CAR), kabilang na ang Apayao, Baguio City, Benguet, Kalinga, Mountain Province, at Abra; Cagayan, Isabela, Nueva Vizcaya sa Region 2; Batangas at Quezon sa Region 4-A; Puerto Princesa sa Region 4-B; Iligan City sa Region 10; Davao City sa Region 11; at Lanao del Sur sa Bangsamoro Autonomous Region in Muslim Mindanao.

Samantala, ang Santiago City at Quirino Province sa Region 2; Ifugao sa CAR; at Zamboanga City sa Region 9 ay isinailalim naman sa modified enhanced community quarantine o MECQ.

Mapapasailalim naman sa modified general community quarantine o MGCQ ang iba pang mga lugar sa bansa.

Sa kanyang “Talk to the People” noong Huwebes ng gabi, Mayo 13, umapela ang Pangulo sa publiko na ipagpaliban muna ang pagsasagawa ng mga pagtitipon na may kinalaman sa pananampalataya, lalo na aniya ngayong buwan ng Mayo, kung kailan ipinagdiriwang ang maraming kapistahan.

“I’ll be more direct than what is written here. I don’t attribute it to any particular religion or what, but there are a lot of fiestas because we are predominantly Catholic country. I’m asking you not only to tone down [but] forego because we have laws. Forego to congregate, to crowd. There’s no problem. God knows we love Him, but the problem is the necessary consequence of it all. Be mindful of that because we are still in the pandemic,” pahayag ni Pangulong Duterte.

Sa ilalim ng mas pinahigpit na GCQ, pinapayagan ang mga sumusunod:

  • Essential travel o pagbiyahe kung may napakahalagang kadahilanan papunta at palabas ng NCR Plus;
  • Indoor dine-in services o pagkain sa loob ng mga establisyimento sa NCR Plus nang hanggang 20 porsyentong seating capacity o hanggang 50 porsyentong seating capacity naman para sa al fresco dining o pagkain sa labas;
  • Hanggang 30 porsyentong venue capacity sa mga outdoor na pook-pasyalan sa NCR Plus. Kinakailangan pa ring sumunod ang mga ito sa minimum public health standards;
  • Specialized markets ng Department of Tourism (DOT), basta’t susundin ng mga ito ang minimum public health standards at ipatutupad ng mga ito ang mga panuntunan at paghihigpit na itinakda ng DOT;
  • Hanggang 10 porsyentong venue capacity para sa mga pagtitipon na may kinalaman sa pagsamba o pananampalataya at mga pagtitipon para sa lamay, burol, at iba pang katulad na mga aktibidad para sa mga pumanaw, maliban na lamang kung ang pagpanaw ay bunsod ng Coronavirus disease 2019 o COVID-19 sa NCR Plus;
  • Hanggang 30 porsyentong venue capacity para sa outdoor non-contact sports; at gayundin ang mga establisyImentong naghahatid ng personal care services kung saan hindi na kinakailangang tanggalin pa ang face mask, tulad ng salons, parlors, at beauty clinics; at,
  • Paglabas ng mga indibidwal edad 18 hanggang 65 taong gulang sa mga lugar na naka-GCQ “with heightened restrictions”.

Sa kabilang banda, hindi pa rin maaaring magbukas sa mga lugar na nasa pinahigpit na GCQ ang entertainment venues, tulad ng bars, concert halls, mga teatro; recreational venues, tulad ng internet cafes, bilyaran, arcades; mga parke, perya, palaruan, kiddie rides; indoor sports courts at venues at indoor tourist attractions; at mga lugar kung saan ginaganap ang mga pagpupulong, conference, at exhibition.

Sa mga lugar na nasa GCQ “with heightened restrictions”, hindi pa rin pahihintulutan ang  pagbiyahe palabas ng NCR Plus, maliban na lamang sa Authorized Persons Outside Residence o APORs.

MGA CHECKPOINT SA BORDER NG NCR PLUS, MANANATILI PA RIN SA ILALIM NG GCQ

NATIONAL

Ni Ivy Atompag
Photo: PNA
Share on facebook
Facebook
Share on twitter
Twitter
Share on email
Email

Sinabi ng Philippine National Police (PNP) ngayong araw, Mayo 14, na mananatili ang quarantine control points sa mga border ng NCR Plus kahit nasa ilalim na ito ng GCQ. 

Sa isang pahayag, inutusan ni PNP Chief Gen. Guillermo Eleazar ang mga kapulisan na nagbabantay sa mga checkpoint na arestuhin at kasuhan ang mga mahuhuling nagbibiyahe ng mga pasahero papasok at palabas ng NCR Plus gamit ang mga van at cargo vehicles.

“The PNP will strictly implement the guidelines issued by the national government regarding the latest quarantine status. Ang NCR Plus nga po ay nasa GCQ (general community quarantine) with heightened restrictions, meaning hindi pa rin po papayagan ang non-essential o unnecessary travel papasok at palabas ng NCR Plus,” saad niya. 

Ito ay matapos maaresto ang ilang indibidwal noong Marso at Abril dahil sa paglabag sa mga protocol para sa essential travel. 

Umapela rin si Eleazar sa mga muling nagbukas na establisyimento na sumunod sa health protocols. 

Ayon sa kanya, maaaring maipasara ang mga ito kapag napatunayang lumabag sa mga panuntunang ipinapatupad ng IATF-EID.

PALASYO KUMPIYANSA SA KAHANDAAN NG ISRAEL EMBASSY, OWWA SA GITNA NG TENSYON

NATIONAL

Ni Monica N. Ladisla
Source: PNA
Share on facebook
Facebook
Share on twitter
Twitter
Share on email
Email

Kumpiyansa ang Palasyo na handa ang embahada ng bansa sa Tel Aviv maging sa Overseas Workers Welfare Administration para sa anumang sitwasyon na maaaring mangyari kasunod ng tumitinding girian sa pagitan ng mga Israelis at mga Palestinians.

Sa isinagawang press briefing kahapon, Mayo 13, inilahad ng embahada at ng OWWA na pamilyar na umano sila sa protocol na kailangang isagawa sa mga ganitong sitwasyon kung saan apektado ang overseas Filipino workers.

“So, hinahanda na po iyong posibleng repatriation at binibigyan na po sila ng warning na kung pupuwede po ay iyon nga po, mag-ingat dahil dito sa mga pag-iinit ng mga pangyayari diyan sa Israel ‘no at sa Occupied Territory,” pahayag ni Presidential Spokesperson Harry Roque.

Kung kinakailangan umano, susunduin mismo ng gobyerno ang mga Pilipinong maiipit sa hidwaan ng dalawang bansa.

“Bihasa na po ang ating mga embahada at ang ating OWWA pagdating sa mga kaguluhan kung saan naroroon ang ating mga kababayan,” ani Sec. Roque.

Samantala, nanawagan naman ang embahada ng Pilipinas sa Israel sa mga Pilipinong naroroon na sumunod sa direktiba ng Israel Defense Forces at ng mga lokal na otoridad doon upang masiguro ang kanilang kaligtasan.

“We call all overseas Filipino workers (OFWs) who are in Israel to listen to the safety instructions, and strictly follow the directives of IDF Home Front Command. Israel is obligated for the safety of its citizens and non-citizens, among them are 30,000 OFWs, students and diplomats, and it has been proven that the directives from the security forces and IDF Home front Command save lives,” pahayag ng embahada ng bansa sa Israel.

Sa datos na nakalap mula sa Department of Foreign Affairs mula noong Hunyo 2020, mayroong naitalang 30,000 Pilipino sa bansang Israel.

PNP COMMUNITY RELATIONS, MAS PINALAKAS SA ‘BARANGAYANIHAN’

NATIONAL

Ni Trish Alcantara
Photo: PNP-PIO
Share on facebook
Facebook
Share on twitter
Twitter
Share on email
Email

Mas pinalakas pa ang partnership at police assistance ng PNP sa mga barangay sa paglulunsad ng BARANGAYanihan (Bayanihan sa Barangay) nitong Mayo 14 sa Camp BGen Rafael T Crame, QC at PROs sa buong bansa.

Sakop ng proyekto ang lahat ng umiiral na police community relations activities ng PNP gaya ng Kapwa Ko, Sagot Ko; Community Feeding Program; Adopt-a-Family Program; PNP Food Bank, atbp. na ipinatutupad sa iba’t ibang police regional at provincial offices maging sa mga police station.

Dadagdagan pa ito ng PNP sa  pamamagitan ng iba’t ibang relief operations, feeding programs, civic activities, etc.

Bukod sa mas pinaigting na community affairs at development component ng pagpupulis, layon din ng programang makuha pa ang tiwala at suporta ng mga nasa barangay.

“Inaasahan ko na ang lahat ng kapulisan ay makikiisa at isasapuso ang proyektong BARANGAYanihan dahil ito ang tunay na kahulugan ng PNP motto na ‘To Serve and Protect’, at ito ang tunay na diwa ng salitang Pilipino,” pahayag ni PNP Chief Guillermo Lorenzo Eleazar.

2 KASO NG COVID-19 INDIAN VARIANT SA BANSA, KINUMPIRMA NG DOH

NATIONAL

Ni Monica N. Ladisla
Source: PNA
Share on facebook
Facebook
Share on twitter
Twitter
Share on email
Email

Kinumpirma ng Department of Health na mayroong dalawang kaso ng Indian COVID-19 variant sa bansa na unang namataan sa India nitong Oktubre 2020.

“For the 46 samples that were sequenced, there were two incoming returning overseas Filipinos who were included, and one came from Oman and the other from UAE. They tested positive for the India variant. No history of travel to India or they did not come from India nor passed through India,” pahayag ni Health Undersecretary Maria Rosario Vergeire.

Ayon kay Epidemiology Bureau Director Alethea de Guzman naka-recover na ang dalawang kasong ito at kasalukuyang asymptomatic.

Sa impormasyong nakalap ng DOH, dumating sa bansa ang unang kaso noong Abril 10 at naka-recover mula sa COVID-19 nitong Abril 26. Noong Abril 19 naman dumating sa bansa ang pangalawang kaso at nakarecover sa virus nitong Mayo 6.

Kasalukuyan, nasa SOCCSKSARGEN ang isang kaso at nasa Bicol naman ang isa pa.

“‘Yung mga passengers na kasama nila sa row ay nag-test negative na po. Inaalam din natin kung sila ay naka-kumpleto na ng quarantine,” pahayag ni De Guzman.

Samantala, hindi pa makumpirma sa kasalukuyan ng DOH kung positibo rin sa ibang COVID-19 variant ang limang pasaherong nagpositibo sa COVID-19 kamakailan.

Nanawagan naman si Usec. Vergeire sa publiko na sumunod sa minimum health standards upang makontrol ang pagkalat ng virus.

“Ang virus po, hindi siya magmu-mutate kung mababa po ang mga kaso. So, kailangan tuluy-tuloy po tayo,” paalala ni Usec. Vergeire.

CPNP ELEAZAR SA MAHUHULING VIOLATORS: ‘BIGYAN NG FACE MASKS ‘YAN’

NATIONAL

Ni Trish Alcantara
Photo: PNA
Share on facebook
Facebook
Share on twitter
Twitter
Share on email
Email

Ipinag-utos ni PNP Chief PGEN Guillermo Lorenzo Eleazar na bigyan ng libreng face masks ang mahuhuling violators na walang pambili.

Ito’y para protektahan na rin kontra virus ang mga imbestigador at maging kapwa nila violators, saad ng PNP Chief.

Nagpaalala ulit ang hepe ng PNP na hindi ikukulong kundi iimbestigahan ang mga mahuhuling lumalabag sa nasabing protocol.

Hindi muna pauuwiin sa loob ng 12 oras ang mga mahuhuli habang tinitingnan ang kanilang record sa mga kaparehong paglabag kung saan ipapataw ang nararapat na penalty.

Ipakikipag-ugnayan naman ng PNP sa judicial authorities ang mga kakikitaan ng warrants of arrest.

DOH: PUBLIKO HINDI DAPAT MABAHALA SA PAGKAWALANG-BISA NG COVID-19 VACCINES SA HUNYO, HULYO

NATIONAL

Raiza F. Cabugwang
Photo courtesy of pia.gov.ph
Share on facebook
Facebook
Share on twitter
Twitter
Share on email
Email

Pinawi ng Department of Health ang pangamba ng publiko ukol sa pagbabakuna ng Coronavirus disease 2019 (COVID-19) vaccines na nakatakdang mawalan ng bisa sa darating na Hunyo o Hulyo ng taong ito.

Ayon kay Health Undersecretary Maria Rosario Vergeire, may 1.5 milyong COVID-19 vaccines mula sa AstraZeneca ang nakatakdang mawalan ng bisa sa susunod na buwan, samantalang ang ilang natitira pang doses ng nasabing bakuna ay nakatakda namang mawalan ng bisa pagsapit ng Hulyo 2021.

“Kailangan maintindihan ng ating mga kababayan na ang pinakamatagal na expiring date ay six months. Minsan ‘pag dumating sa isang bansa, ganito na ‘yong time for expiry,” paliwanag ni Vergeire, tagapagsalita rin ng Kagawaran.

Natanggap ng bansa ang pinakaunang suplay nito ng AstraZeneca vaccines noong nakaraang Marso. Sinundan naman ito ng pagdating ng mga karagdagang suplay, kabilang na iyong lumapag nito lamang Sabado, Mayo 8.

Sa kasalukuyan ay nasa 2,556,000 doses ng AstraZeneca vaccines ang natanggap na ng bansa sa tulong ng COVID-19 Vaccines Global Access o COVAX facility, na siyang nangangasiwa upang tiyakin na pantay-pantay ang natatanggap na suplay ng COVID-19 vaccines ng lahat ng mga bansa sa mundo. Nasa 1.2 milyong doses ng AstraZeneca vaccines na binili ng mga pribadong kumpanya ang inaasahan namang darating ngayong Hunyo.

Kinakailangang iturok ang dalawang doses ng nabanggit na bakuna sa pagitan ng apat hanggang 12 na linggo.

Sinabi ni Undersecretary Vergeire na inaasahan ng pamahalaan na maipamamahagi na ang lahat ng doses ng AstraZeneca vaccines sa huling linggo ng Mayo o sa unang bahagi ng Hunyo.

“Wala po tayong dapat ikabahala. Nakagawa na po ng mekanismo on how we can consume these vaccines,” pagtitiyak ni Vergeire.

CONTACT US

Anchored on its mantra, “Sentro ng Katotohanan, Tapat sa Mamamayan”, Balita Central Digital complements and supports the Balita Central newspaper published bi-monthly to combat fake news and to provide the public with easy-to-digest news bits that are sourced solely from the Presidency and government agencies. 

Balita Central is under the supervision of the Bureau of Communications Services (BCS), one of the attached agencies of the Presidential Communications Operations Office (PCOO).

Launched on February 28, 2019 at the Manila Light Rail Transit System Line 2 (LRT-2) Cubao Station, Quezon City, it also aims to raise awareness among local communities about the policies, programs, and accomplishments of the Presidency. 

Through this platform, Balita Central Digital aims to reach further the online community to deliver more accurate information and communication services in order to educate the citizenry regarding national issues which would enlighten them to be engaged and be empowered in contributing to building a better nation.

Balita Central is situated at the BCS Headquarters located beside the Philippine Cancer Society along San Rafael, San Miguel, Malacañang Complex, Manila City. Its official website address is balitacentral.ph.

For inquiries and feedback, Balita Central may be contacted at editorialdesk.bcs@gmail.com.