MIYEMBRO NG COAST GUARD, NASALISIHAN SA TAFT, MALATE
Ni Joan Alcantara
Isang miyembro ng Philippine Coast Guard ang nasalisihan ng cellphone na nagkakahalagang PhP65,000 sa Coffee Project sa Taft Avenue corner P. Ocampo St. Malate, Manila nitong Oktubre 2 bandang 7:05 p.m.
Iniwan lang saglit diumano ng biktimang si Christopher Daño, 42, residente ng No. B1 Lt. 17 Brecia Subd. Lilac St. West Fairview, Quezon City ang cellphone sa isang charging outlet para pumunta sa counter kasama ang kanyang misis nang salisihan ng isang lalaking nakaupo rin sa loob ng shop hindi kalayuan sa mesa ng biktima.
Nakita sa CCTV na nasa 5 7″ ang taas nito, tinatantiyang 30 taong gulang, at nakasuot ng asul na jacket at itim na pantalon.
Dali-dali itong tumalilis pagkapuslit ng Samsung S9 Plus ng biktima.
Kasalukuyang iniimbestigahan ng Adriatico Police Community Precinct ang kaso gamit ang CCTV para sa posibleng pagkakakilanlan ng suspek.
